اغنية لاحتفالات 6 كانون المجيد
شعر
محمد عليوي فيّاض
عمران المحمدي
رف عالي العلم يتباها بيدك
يا درع العرب كانون عيدك
عل سرفة طويت البيد للشّام
يسور الوطن يا باسل يمقدام
انته العل مذلّة ابد متنام
تكمل هيبة الامّة ابرعيدك
رف عالي العلم يتباها بيدك
يا درع العرب كانون عيدك
بالتكبير بيديك العلم رف
واسلاحك ابكل صولة عجل خف
اضعاف النّويف السّال بالطّف
نزفت او مابخل بالدّم وريدك
رف عالي العلم يتباها بيدك
يا درع العرب كانون عيدك
ماترضه ابمذلّه او لا تطخ هام
ولا يرضيك حرّه امكدّرة اتنام
يظل كانون باسمك يحجي كل عام
تجدّد بالفدا او بيّن جديدك
رف عالي العلم يتباها بيدك
يا درع العرب كانون عيدك
ملاحم للسّفر بالنّزف خطّيت
او بجناحك عرايا اضعاف غطّيت
ارتال او كتايب صيد ربّيت
اتردد مجد ماضينه نريدك
رف عالي العلم يتباها بيدك
يا درع العرب كانون عيدك
بالكلفات تبقه انته المجاهد
ابزود ابطالنه سمر السّواعد
يل توفي الوعد لمّن تواعد
كل العرب تتنّه ابنشيدك
رف عالي العلم يتباها بيدك
يا درع العرب كانون عيدك
تظل طول الزّمان اتخرّج ابطال
او تعدل كل حمل للعرب لو مال
بيك امعلكه احلام الاجيال
اوحبّ الشّعب لابطالك رصيدك
ليست هناك تعليقات:
إرسال تعليق