النِّيل والمسحراتي
قول يا مسحراتي قول
واحكي على نهر النِّيل
اللي وَهَبه لينا
ربّنا الرزاق الجليل
اللي رسم لمصر
جعلها ف كل عصر
لكل خير سبيل
أجرِي يا نيل يا نيل أجري
دا أنت في جمالك حصري
زَرَعْت بيك أرضي
وبَنِيت بيك قصري
ولون بَشْرتي منَّك
زي لون قمحي
يا نيل يا كوثر
مهما يخططوا
مَيّتَك أوفر
حضارتك من سنين
على كل المصريين
وعلى ضفافك أنثر
انثر الخير يا عذْب
دا انت من زمن
نبع خير وجذْب
نفديك بأرواحنا
بموتنا وجراحنا
لو دقَّت على راسنا
أي طبول حرب
نزرع ونشرب
انسان وحيوان
وكل كائن حي
والله ما فيك زي
وكمان منك الضي
الضي من سدك العالي
اللي بناه جدي
وعرق عمي وخالي
مع الأبيض الدلتاوي
والاسواني الأسمراني
اللي وصُّونا نحافظ عليه
ما نرمي الأذى فيه
دا كل اللي حوالينا
بيحسدونا عليه
وإن قدروا ياخدوه مننا
يبقى راحت علينا
وراحت عليك وعليه
فهمت يا اسمك ايه
دا النيل كل حياتنا
من زمن مصدر حضارتنا
دا ملك لينا كلنا
الفقير والبيه
قول يا مسحراتي قول
ووصي ابن الأصول
على نهرنا العذوب
ومهما يخطط العدو
للنيل رب يحميه
للنيل رب يحميه
بقلمي
رمضان محمد محمود
ليست هناك تعليقات:
إرسال تعليق