... بيتنا زمان....
مشتاق لبيتنا زمان
وصحبة الجيران
والسلام م الشبابيك
و ازيك ياعم فلان
وبرج الحمام والطير
والخير أشكال وألوان
وتفتش عن البيض
تلاقيه ف الأركان
وم الصبح بدري الخبيز
وطقطقة الحطب ف الأفران
وسحبة المطرحه للعيش
ورصة الصيجان
وبلاليص المش المعتق
وخرقه قماش غطيان
والعيال ع السطح تجري
و طياره ورق بخيطان
وروح دفيانه مش خايفه
بتسمع الآدان
..............
أحمد عوض الله أحمد
ليست هناك تعليقات:
إرسال تعليق