إنسان على الهامش ؛؛ بقلم الشاعر محمد الهادي

 (( إنسان على الهامش ))

..

..

(1)

عايش حياتى

عايش ...

فى دنيتى وأنا  ..

ما ليش لازمة.

(2)

كل الناس حواليا 

بتحاول ..

تنصحني ..

وتنصحنى ..

وتصحصحنى ..

وأنا فى الأصل ..

كان ليا ... لازمة

(3) 

 وبسمع من الكل ..

وبمشي ورا الكل ..

بمشى زى الضل ..

وأنا اللى كنت فاكر  

فكري علو التل

بس أعمل إيه؟؟

عايز يبقالى لازمة.

(4)

وبرغم إنى بعمل اللى عليا 

والناس شايفانى ..

كد المسئولية ..

وعمري ما ملكت إللى فى إيديا

بس أنا حاسس ..

إنى باصص تحت رجليا 

مع إن ليا أحلام شايفها بعنيا

بس مش عارف أطولها 

وامسكها بإيديا 

وعشان كده حاسس ..

إنى ما ليش لازمة.

(5)

زمان .. كان ليا لازمة 

وكان ليا كوم أحلام

بس ماعرفتش ..

أمشى فى دنيتى ل.. قدام

لقيتنى .. ماشى ل.. ورا 

ونسيت كل إللى اتقرا ..

ووقعت كأنى .. عميان

وحسيت إنى ... لا أرى

وضاعت منى كل الأحلام

كلتها غيلان الأوهام 

وقهرتنى كل الأيام 

لحد .. ما رضيت ..

ونخيت ..

واكتفيت ..

أعيش من غير لازمة

(6) 

يا دنيتى ..

سبينى فى حالى 

خلاص أنا .. مليت 

أنا .. كليت 

وما صدقت .. 

إنى قدرت .. ونخيت

وشوفت نفسى .. جبانة 

وكنت هادخلها فى جبانة 

بس رجعت .. ووطيت 

وعملت نفسى .. أعمى 

وأنا فى الأصل .. 

مستعمي .. ومتغمي 

وورا حيطان الخوف .. 

متخبي .. ومتخفي

وقلت : أحسن 

خلينى كده .. ماليش لازمة

(7) 

يا دنيتى يا قاهراني

ماعرفش أنا حبيتك ليه !!

وماعرفش إنتى حاطاني 

عالهامش ليه !!!

ويا ريتك سايباني ..

بردو ... خانقاني .. 

وقاتلاني ..

وجوه الهم والغم 

ودموعي اللى خلتيها .. دم

سايباني .. معرياني ..

ومش دافناني 

(8) 

طب عايزة من إيه ؟

تكونيش عالهامش .. مش عايزاني 

تكونيش .. رافضاني ؟

ولا رافضة حياتى من غير لازمة ؟

طب لو كده .. بالراحة عليا 

فهميني .. وعيني ... 

لازمتي فى إيديكى ... وريني 

يمكن أسيب الهامش 

وصدقيني .. 

نفسى لكده .. ناوية وعازمة

يمكن فيكى ..

يبقالي .. لازمة .

بقلم/ محمدالهادي