صمت الخوف (756)
..................
كان نفسي أخبيك
جوا قلبي فيه أمان
بيدق خايف كله خوف
من الخوف كمان
لا كان بأيدي أمنعه
خايفه في حضني تسمعه
جف الأمان في صدري
مر هترضعه
جوايا ساكن نبض روح عايش
وساتره هدمته من كوم جروح
بلاش تشوفني كلي خوف
وصوتي محبوس
تايهه منه ضحكته تايهه الحروف
حتى العيون جفت دموعها من الألم عاجزة تبوح
كان نفسي تتربى فى زمان
ترضع حنان ترضع أمان
تكبر تعمر في المكان
تزرع سلام تجنيه كمان
دلوقتي عايشين ع الدمار
أنفاس ملاها الموت بريحته
في كل دار
والعمر وقفت لحظته ساجنه المرار
لا عاد فيه ضله من الوجع
ولا عاد فيه دار
ونسيم ربيعي إتمحي بغدر الكبار
أتمنى أحلم بالنهار
وشمس تيجي بضيها فارده السلام
كان نفسي أخبيك
جوا ليل ورا ألف دار وغصب عني نص حيط في حطام جدار
كان نفسي أصرخ جوا مني بارود ونار
بقلم .. صبري رسلان
ليست هناك تعليقات:
إرسال تعليق